Konfreise nach Basel 2020
Die diesjährige Konfreise führte die Jugendlichen aufgrund der Corona-Krise zwar nicht wie geplant nach Berlin, dafür durften sie Basel unsicher machen - und dabei viel Spannendes erfahren.
(13.07. – 15.07.2020)
Juhu, ändlich isch es Mäntig! Jetzt dörfed mer Basel unsicher mache. Henggart hämmer mit viel Motivation und Vorfreud per Zug verlah. Nach unzählige Runde Bohnanza und tolle Gspräch isch oises Ziel in Sicht choh. Chum in Basel acho, hämmer ois mit Sack und Pack uf de Weg zur Elisabethe-Chile gmacht. Nach churzem Ufenthalt simmer müed gsi und es isch ois schwer gfalle ois z‘konzentriere, doch de Ehrgiiz hät ois packt und mir händ ois im Chilegäschtebuech verewigt. Nach dem kreative Iisatz simmer in Bus iigschtige, bis zu Spahletor gfahre und händ oisi Rollköfferli ad Missionsstrass 21 zu oisem Hotel zoge. Iicheckt hämmer und ab isch es losgange…
Wow, sind oisi Zimmer schön gsi! En churze power nap hät natürli nid dörfe fehle. Gschwind hämmer im Basler Münschter verbiigügsled, händ de Turm beschtige unterem Zeiche vo Corona und scho isch es wiitergange go shoppe. Nachere wegsuechende Rückkehr zum Hotel (trotz Charte und Hand; trotz oisere Orientierig hemmers den doch no gschafft), hämmer ois frisch gmacht und sind mit viel Hunger uf de Wäg zumene super guete italienische Restaurant. Sehr guet hämmer ois quer durchs ganze Menü gässe bis mer nüm händ chöne. Zum Verdaue hämmer ois alli ines Zimmer gsellt und händ deht dä Abig mit lustige Gspräch und Spiili usklinge lah.
Natürlich hämmer i dere Ziit au viel über d Gschicht und Gegewart vo oisem Hotel und em Bildigshuus mission 21 ghört oder über die verschiedene Chile glernt; au hämmer viel fürd Konf selber plant und organisiert.
A eim Tag hämmer ä recht spannendi Tour gha zum Basel mal vonere andere Siite z‘gseh, nämlich so, wies die Obdachlose gsehnd und erlebed. Das isch sehr iidrücklich und interessant gsii.
Mit viel verschiedene Iidrück simmer wieder z‘Henggart acho. Im Ganze isch d‘Basel-Reis aber, trotzdem dass mer wägem Lockdown i de Frühligsferie nid uf Berlin händ chöne, sehr lääs gsii. Es paar Täg meh, hettis guet no möge liide.
Ciara Niedermann
